24 сентября 2016
Қалалық әкімдіктің сайты жаңартылды
Бүгіннен бастап Орал қаласы әкімінің жаңғыртылған ресми сайты іске қосылды. Сайттың дизайнымен қатар ондағы қажетті ақпараттар да толықтырылған. Ғаламтор желісі арқылы тұрғындар өздері іздеген мекеме-кәсіпорындарды тауып, мемлекеттік атқарушы органның қызметімен, өзге де Орал қаласында болып жатырған әлеуметтік, мәдени жаңалықтарды таба алады.
Орал қаласы әкімдігінің сайтын жыл басынан бері тәулігіне орта есеппен 250 адам қараған. Шаһар басшысына 405 түрлі ұсыныстар түскен. Олардың басым бөлігі коммуналдық шаруашылық саласы, аулаларды абаттандыру, жол мәселесі, білім мен бала бақшалар кезегіне қатысты екен. Жаңғыртылған сайтты жасақтаушылар жаңадан енгізілген мобильдік нұсқа Орал қаласы қонақтары мен туристтерге сенімді көмекші боларына сенімді. Қаланың картасымен қатар өзге де қажетті нысандар туралы барлық ақпараттар осы жерде табылады дейді олар. Ал, «халықтық бақылау» топтамасына тұрғындар өздері куәгер болған түрлі құқық бұзушылықтар, өзге де мәліметтердің бейне жазбасы мен фотосуреттерін жібере алады. Соңғы үш ай бойы толық жаңғыртылудан өткізілген сайт тұрғындарға тез ақпараттар алып, шұғыл шешімдер қабылдауы үшін туғызылып отырған мүмкіндік.
- Ресми сайтты қараушылардың 65 пайызы жеке компьютері арқылы енген, ал қалғаны смартфондар мен планшеттер арқылы тамашалаған. Бұл туралы нақты статистикалық мәлімет бар. Сол себепті, халыққа қол жетімді болу үшін, әрі кез-келген уақытта қажетті ақпараттарды табуға мүмкіндік болуы үшін сайтты толық жаңғыртудан өткіздік. Қаладағы түрлі мәдени, көпшілік шаралар, спорттық сайыстардың қайда және қашан өтетіндігі туралы да ақпараттар осы жерде табылады. Барлық ақпараттар уақытында толықтырылып, жаңғыртылып, жаңартылып тұрады, - дейді Орал қаласы әкімі аппаратының басшысы Сәкен НҰРТАЗАЕВ.
Еске сала кету керек, осыдан бұрын Орал қаласының электрондық картасы (ресми атауы - мемлекеттік қала құрылысы кадастры) жасалды. Орал - мұндай картаға ие болған Астана мен Қарағандыдан кейінгі үшінші қала. ҚР мемлекеттік кадастры ақпараттық-құқықтық жүйесіне енетін картада қаланың бұрынғы және қазіргі аумағы, ғимараттары мен орындары, құрылысы мен инженерлік желілері туралы деректер бар. Аталмыш картаны жасауға 209 млн. теңге жұмсалып, түрлі дерек жинау жұмыстары үш жыл бойы жүргізілген.
Арман Курманалиев