Оралда 180 пәтерлі үйдің кілттері табыс етілді

Тұңғыш Президент күніне орай Орал қаласында 180 пәтерлік жаңа үй халық игілігіне берілді. Зачаган кентіндегі 9 қабатты зәулім үйдің пәтер кілттері кезекте тұрған оралдықтарға салтанатты жағдайда табыс етілді. Олардың қатарында көпбалалы отбасылар, жетімдер, мүмкіндігі шектеулі жандар мен бюджеттік сала мамандары, мемлекеттік қызметкерлер бар. Иллюстративное фото из архива "МГ" Оралда әр мерекені жаңа үйді тапсырумен қарсы алу дәстүрге айналғандай. Бұл жолы да тағы 180 отбасы баспаналы болды. «Қоныс құтты болсын» айтқан облыс әкімі бұл – Мемлекет басшысының қамқорлығы екенін тілге тиек етті. - Биылғы жылы біздің өңірімізде ел тәуелсіздігінің 25 жылдық мерекесіне орай тұрғындарға жалпы саны 1500 пәтер берілмек. Халықты тұрғын үймен қамту Орал, Ақсай қалалары мен облысымыздың әр ауданында жүзеге асып жатыр. Бұл игі іс келер жылы да жалғасын табатын болады. Бой көтерген тұрғын үйлер кезекте тұрған отбасыларға, «Тұрғынүйқұрылысжинақбанкі» АҚ салымшыларына, ардагерлерге, көп балалы және жас жанұяларға, асыраушысынан айырылған және мүмкіндігі шектеулі жандарға берілетін болады, - деді Батыс Қазақстан облысының әкімі АЛТАЙ КӨЛГІНОВ. Көп жылдан бері тұрғын үй кезегінде тұрып, мерекеде қуанышқа кенелгендердің бірі - көп балалы отбасы Иманғазиевтер әулеті. Осы жақсылықты 24 жылдан бері күткен отағасы жаңа баспана құтты қоныс болады деп сенеді. - Ең алғаш маған телефонмен хабарласып, «ал, сіздің кезегіңіз келді, келіп қол қойып кетіңіз» дегенде, төбем көкке бір елі жетпей қалды. Қуанышты естіген бойда үйді айналып, жүгіріп, тіпті, не істерімді білмей қалдым. Енді, міне, 3 бөлмелі пәтерге көшіп келдік. Отбасымда 6 баламыз бар, - дейді отағасы ЖҰМАБЕК ИМАНҒАЗИЕВ. Мереке күні баспаналы болғандар қатарында балалар үйінің 36 түлегі бар. Мсәлене, осы кезге дейін «Шаңырақ» үйін мекен еткен Логвиненколар отбасы екі бөлмелі жайлы қоныста жаңа өмірлерін бастамақ. Жергілікті «Болашақ» құрылыс компаниясы тұрғызған бұл жаңа үй беларустық жоба бойынша салынған. 3 бөлмелі пәтердің жалпы аумағы 84 шаршы метр болса, 2 бөлмелі - 60, ал 1 бөлмелі қоныстың көлемі – 40 шаршы метрді құрайды. Бұл күні жаңа баспана иелерін қуаныштарымен құттықтаған өңір басшысы әр үйге кіріп, игі тілегін білдірді. Мүмкіндігі шектеулі Шукеевтер отбасына теледидар тарту етті. Мереке күні пәтер кілттерін алған отбасылар жаңа жылды жаңа мекенде қарсы алатындықтарына қуанышты. Құрылыс компаниясы үй маңын абаттандыру жұмыстарын алдағы көктемде толықтай аяқтауға уәде етіп отыр. Арман Курманалиев