Оралда оқу орындардың бірі тарихи-мәдени ескерткішті сатып алды

Көненің көзіндей болып осы күнге дейін сақталып келген тарихи нысанды сатып алушы табылған. 10 жыл бойы қаржылық корпорацияда кепілдікте азып-тозып тұрған ғимарат енді жөнделіп, дұрыс мақсатта пайдаланылады деген сенім бар. Себебі ауқымды көлемдегі үйді Махамбет Өтемісов атындағы БҚМУ сатып алыпты. Еліміздегі және аймақтағы маңдай алды оқу орны Чапай көшесі 18 мекен-жайындағы көне ескерткішке 58 млн. теңге төлеп, оны жатақхана немесе зертхана ретінде пайдалануға ниетті. Алайда нақты қандай оқу бөлімшесі болары әзірге жария етілмей отыр. Бір анығы-ғимараттың тарихи келбеті сақталып, толықтай жөнделіп, жаңғыртылатын болады. Білім ордасы осылайша бүгінгі күнге дейін тағдыры бұлыңғыр болып, жеке қолдан қаржылық ұйымға кепілдікке өткен ғимаратты қайтадан мемлекеттік меншікке қайтарып отыр. Бұрын мұғалімдер семинариясы орналасқан Вияхирев деген көпестің үйі бірнеше жыл бойы қараусыз, күтімсіз, аянышты жағдайда тұрды. Мемлекеттік инспекция мамандары бұған алаңдаушылық туғызып, тарихи ескерткішті сақтап қалудың жолдарын қарастырған. -«БҚО-да жалпы саны 2153 ескерткіш болса, оның 1966-сы археологиялық ескерткіш болып табылады. 122 тарихи мұра саналған ғимараттың 20-сы жеке тұрғын үй қорына берілген. Соның бірі Шапай көшесі 18 мекен-жайында орналасқан осы ғимарат болатын»,-дейді БҚО тарихи-мәдени мұраларды қорғау инспекциясының басшысы Талғат Жүсіпқалиев. 1878 жылы салынған нысан мәслихаттың экс депутаты Мұрат Жаркеевтің інісі Нұрлан Жаркеевке тиесілі болған. Аталмыш үйде өз-өзіне қол жұмсаған марқұм азамат көзі тірісінде ғимартты несие корпорациясына кепілдікке қойып, 72 млн. теңге несие алған. Отбасындағы келеңсіздіктер мен қаралы оқиғадан соң аталмыш соманың 60 млн. теңгесі төленбей қалады. Үй кепілдікте тұрған аграрлық несие корпорациясы ғимаратты сату үшін осыған дейін біраз келіссөздер жүргізген екен. -«Ғимарат тарихи-мәдени мұра болғандықтан, сатып алушы оны бұза алмайды және сыртқы кейпін өзгертуге де рұқсат етілмейді. Осыған байланысты қала орталығындағы ауқымды жер теліміне ғана қызыққан құрылыс компаниялары мен өзге кәсіпкерлер аукционға қатыса алмады. Бүгінгі күнге дейін ғимарат марқұм болған азаматтың мұрагер әйеліне тиесілі болып саналғанымен, кепілдікте тұрған еді",-дейді "Аграрлық несие корпорациясы" АҚ филиалы директорының орынбасары Марат Абдулов. Айта кетейік, 5 жыл бұрын Баян Мақсатқызының продюсерлігімен "Күләш" (Бұлбұл) фильмі дәл осы үйде түсірілген болатын. Көне ғимарат шығармашылық алаңға айналды дегенге бүгінде сену қиын. Арман КУРМАНАЛИЕВ