Астана күні қарсаңында Орал қаласында көпсалалы спорттық алаңдар пайдалануға берілді

Алғашқы нысан Сырым Датұлы көшесінде ашылды. Ол футбол, волейбол, баскетбол ойнауға арналған әмбебап алаңнан, жүгіру жолағынан, стрит воркаут және балалардың ойын алаңшасынан тұрады. - 20 жылда Астана өсіп-өркендеп қана қоймай, аймақтардың көркеюіне де серпін берді. Біздің Орал қаласы дамуы қарышты. Жаңа шағын аудандар пайда болып, көшелер жаңғыруда. Бұл жер 10 жыл бұрын бос жатқан еді. Енді міне спорттық алаң салынып, міне қасында 16 қабатты зәулім үй бой көтерген. Мұның бәрі тұрғындардың игілігі үшін жасалып отыр. Дені сау ұрпақ тәрбиелеуге септігін тигізеді деген ойдамын, - деді жиналған жұртшылықты құттықтаған қала әкімінің орынбасары Алтынбек Қайсағалиев. Спорт алаңы салтанатты жағдайда ашылған соң командалар арасында түрлі сайыстар өткізіліп, үздік атанған балғындар сыйлықтарға ие болды. Ең бастысы нысан тұрғындардың, жас буынның көңілінен шығып отыр. - Өте қуаныштымыз. Енді ауладағы балғындар бос уақытын тиімді өткізеді. Мен өзім де спортпен шұғылданғанды жақсы көремін. Сондықтан қолым тигенде келетін сүйікті орынға айналары сөзсіз, - дейді қала тұрғыны Бекзат Тастілеуов. Ал жас өрен Әлішер Сегізеков, футбол үйірмесіне қатысатынын айтады. Жақын жерден спорт алаңының ашылуы үйге келгенде де жаттығу жасауға мүмкіндік береді, - дейді ол. Дәл осындай спорт алаңдары қаланың солтүстік-шығыс ауданы мен Құрманғазы көшесінде ашылды. Игі іске ата-аналар разы. Өйткені балалары көз алдында ойнап, әрі денсаулыққа пайдалы іспен айналысады. - Алаңның ашылғаны жақсы болды. Балаларымыз бұрынғыдай ұялы телефон мен компьютерге телмірмей, таза ауда ойнайды, спортпен шұғылданады. Әрі алаң үйдің қасында, - дейді Кендегүл Упранова. - Былтыр шаһарда 20 спорт алаңының құрылысы басталды. Оның оны пайдалануға берілсе, үшеуі Астана күніне орайластырылып ашылуда. Жыл соңына дейін қалған 10 алаңды салып бітіру көзделіп отыр, - дейді қалалық мәслихаттың хатшысы Аққали Әубекеров. Соңғы екі жылда Орал қаласы бойынша 40-тан астам спорттық алаң халық игілігіне берілген. Бұл жұмыс алдағы уақытта да жалғасады. Мәселен қазір қала тұрғындарынан 18 спорттық алаң салу жөнінде ұсыныс түсіп отыр. Арман КУРМАНАЛИЕВ
Стали очевидцем происшествия?  WhatsApp