Орал қаласында тұрғын үй құрылысы қарқынды

ҚР Инвестициялар және даму министрлігінің Құрылыс және тұрғын үй шаруашылығы комитетінің төрағасы Мархабат Жайымбетовтің қатысуымен алқалы жиын өтті. Онда, «Нұрлы жол» және «Нұрлы жер» бағдарламалары аясында атқарылып жатқан іс шаралар талқыланды. Батыс Қазақстан, баспана құрылысы қарыштап дамып отырған облыстың бірі. Соңғы жылдары Оралда ондаған көпқатабатты үй бой көтерді. Мәселен 2015 жылы 157 мың шаршы метр баспана пайдалануға берілсе, 2017 жылы бұл көрсеткіш екі есеге дейін артты. Ал биыл 415 мың шаршы метр тұрғын үй салу жоспарланса, оның тең жартысы қазірдің өзінде іске қосылған. Осы орайда ҚР Инвестициялар және даму министрлігінің Құрылыс және Тұрғын үй шаруашылығы комитетінің төрағасы Мархабат Жайымбетов, өңірдегі құрылыстың қарқынын оң бағалады. - 1991 жылға дейін «Бүкілқазақстандықтарды тұрғын үймен қамту» бағдарламасы қабылданып, іске асқан еді. Сонда елімізде жылма жыл 6 млн. шаршы метр тұрғын үй іске қосылған еді. Біз қазір сол көрсеткіштен екі есеге асып түстік. Мәселен былтыр республика бойынша 11 млн. 200 мың шаршы метр іске қосылды. Биыл бұл межені 12 млн-ға жеткізу жоспарлануда. Бұл істе сіздің облыстың үлесі елеулі. Бүгін Оралды аралап көрдік. Қала үлкен құрылыс алаңына айналған. Тұрғын үйлер салу қарқынды, жаңа шағынаудандар пайда болуда. Инженерлік желілелер мен жылу жүйелерін жаңғыртуда да жақсы істер тындырылуда, - деді ҚР ИЖД министрлігі Құрылыс және тұрғын үй шаруашылығы комитетінің төрағасы Мархабат Жайымбетов. Статистикаға сай бүгінде әрбір қазақстандыққа 21,6 шаршы метр тұрғын үйден келеді. 2030 жылға дейін бұл көлемді 30 шаршы метрге жеткізу мақсаты қойылып отыр. Осы ретте облыста арендалық және несиелік баспанаға сұраныс артып отыр. - Қазір 60 мың адам «Тұрғын үй құрылыс жинақ» банкінің салымшысы. Бұл көрсеткіш жыл санап ұлғаюда. Мысалы 2016 жылы 39 мың болса, екі жылда 20 мың адамға артты. Осы салымшылардың 7 мыңы 30 пайыздық қаржысын жинап үлгерген. Яғни несиелік баспанаға деген сұраныс өте жоғары, - дейді облыс әкімінің орынбасары Бағдат Азбаев. Апатты үйлер мәселесі де рет-ретімен шешілуде. Әйтсе де осы санаттағы баспаналар саны Оралдың өзінде 40-тан асады. Облыс әкімінің орынбасары ескі тұрғын жайларды сүрудың механизмдері «Нұрлы жер» бағдарламасына енгізілсе, жұмыс оңтайлана түсер еді деген ұсынысын жеткізді. Жалпы облыс орталығындағы баспана құрылысына биыл 13 млрд. теңге қарастырылып отыр. - Қазіргі таңда 13 тұрғын үйдің құрылысы жүргізіліп жатыр. Сонымен қатар тағы 16-ның құрысылын бастағалы отырмыз. Оның ішінде Зачаганск кенттік округында 9, шаһардың солтүстік-шығыс аумағындағы жаңа шағынауданында 7 баспана. Жалпы 2018 жылы тұрғын үй құрылысының көлемі 159 мың шаршы метрді құрайтын болады. Бұл жалпы алғанда 3242 пәтер, - дейді Орал қаласының әкімі Мұрат Мұқаев. Елбасы тапсырмасына сай ауыз сумен қамтуға ерекше көңіл бөлініп отыр деді комитет төрағасы. Сондықтан осы бағытта ілкімді жобалар болса 10 млрд. теңгеге дейін қаржылай қолдау көрсетілетіндігін атап өтті. Алқалы жиынға құрылыс саласында еңбектеніп жүрген кәсіпкерлер де қатысты. Олар, министрлік өкіліне өздерін толғандырған сұрақтарын қойып, нақты жауап алды. Арман КУРМАНАЛИЕВ