Оралдағы «Аналар үйінде» 14 жас ана бесік тербетеді

Оралда қамқорлықсыз қалған жас аналарға арналған «Аналар үйі» бар екенін біреу білсе, біреу білмейді. Жетімді жылатпай, жесірді қаңғытпауға сеп болған бейімдеу орталығында бүгінде 14 жас ана бесік тербетеді. Тағдыр тәлкегімен жалғызбасты ана атанып, жақын-жуығының мейіріміне зәру болған жандармен біз де тілдесіп қайттық. Бұл үй жас аналардың жылы ұясына айналды. Әрқайсысының тағдыр-таланы әр түрлі болғанымен, басынан өткерген оқиғасы мен кешкен сезімі тым ұқсас. Сатқындық, аяққа тапталған ар-намыс пен жалғыздық. Жасжарымдағы баласын құшағына басқан Айман өткен күнді өкінішпен еске алады. Балалар үйінде тәрбиеленген ол баланың әкесімен кездейсоқ танысқанын айтады. - Подружкам арқылы туған күнде таныстым, - деп жалғастырды әңгімесін Айман. - Бір ай жүрдік. Бір айдан кейін бірге тұруға шешім қабылдап, тұра бастадық. Ол көп ішетінді шығарды. Жұмыс істемейді. Тіпті үйіндегі әке-шешесімен бірге отырып ішеді. Мен басында келгенде олай болады деп ойламадым. Сосын екі ай жарымнан кейін мен кетіп қалдым. Бірақ кеткенде мен екіқабат болып қалғанымды білмедім. Сөйтіп, 20 жасар бойжеткен алтыайлық жүктілік мерзімінде Аналар үйінің табалдырығын аттайды. Осында Айдын есімді сәбиі дүниге келеді. Өзге жас аналармен еркін тіл табысып кеткен ол қазір жағдайының жайлы екеніне қуанады. - Жағдайым жақсы. Барлық қажеттілік бар. Бәрі бар. Ештеңеге қиналмайсың. Мен мында келгенде, мысалы, тек қана орамалым мен тек сырт киімім болды. Ал қазір шкафыма киім сыймайды. Балам балабақшаға барады. Тегін орналастырып берді. Пәтерге кезекте тұрмын. Оқып, аспаз мамандығын алып шықтым, - дейді Айман. Қазір «Аналар үйінде» 14 жас ана балаларымен тұрып жатыр. Дені – от сезім құшам деп, опық жеп, еркектің алдауына көніп, сезімдері аяқасты етілген бұрымдылар. Жақын-жуығынан, жан жарынан қолдау таппай, тағдыры тығырыққа тірелген жалғызбасты аналар да бар. Бейімдеу орталығы құрылғалы бері екі жылда 60-тан аса жас ана көмек алған. Олар тек мұнда бір жыл ғана тұрақтауға құқылы. Нәзік жандардың әрі қарайғы тағдыры да қадағаланады. - Аналар үйінде орын жоқ деген жағдай болмайды. Қасымызда Ақтөбе, Атырау, Ақтау бар. Біздер тіпті, Астана қаласына жас ананы жіберген кезіміз болды. Өйткені, баланың әкесі сол жақтан болып шықты. Яғни әр кезде жағдай әр түрлі. Мәселен, босанған қыз бала ақтөбелік, бірақ осында оқуға келіп, қиын жағдайға тап болуы мүмкін. Ондай кезде Ақтөбеге жібереміз. Немесе оларда орын болмаса, бізге жолдайды. Қыздар аналар үйінен кеткен соң да хабарласып тұрамыз. Көбі жұмысқа тұрып, ата-анасымен араласып, отбасына оралады, - дейді «Аналар үйі» қоғамдық қорының үйлестірушісі Надия Лисицына. Аналар үйі қоғамда тастанды балалардың азаюына үлкен сеп болып отыр. Бірақ осы тұста бала асырап алғысы келетін жандар үшін былайғы жұрт біле бермейтін бір мәселе туындапты. Әдетте көпшілік жасқа толмаған сәбиді бауырына басқысы келеді. Ал қазір балалар үйіне мұндай нәрестелердің түсуі кеміген. Есесіне асырап алушылардың саны артқан. Сондықтан ер жеткен баланы асырап алудың еш қиындығы жоқ екенін түсіндіру мақсатында арнайы орталық ашылыпты. Бұл аналар үйі қоғамдық қорының екінші әлеуметтік жобасы. Арман Курманалиев