Оралда әлеуметтік жетімдіктің алдын алу керек

Әр баланың отбасында тәрбиеленіп, өсуіне жағдай жасау. Бұл өңірге келген Білім және ғылым министрінің кеңесшісі Балия Әкімбекова сапарының негізгі мақсаты. Жетім және ата-ананың қамқорлығынсыз қалған балаларды отбасылық бағытта тәрбилеуді қалай ұйымдастырамыз? Осы сұрақ кеңесшінің жергілікті білім беру қызметкерлерімен өткен кездесуінде талқыланды. Жетім және ата-ананың қамқорлығынсыз қалған балалардың құқығы әр кезде қорғалады дейді облыстық білім басқармасының өкілдері. Оларды әлеуметтік жағынан қорғау да ұмытылмайды. Мәселен, өткен жылы балалар үйінің 27 тәрбиеленушісі баспаналы болған. Бүгінде өңірде жетім және ата-ананың қамқорлығынсыз қалған 900-ден астам бала бар. - Облыс көлемінде қазір екі жетім және ата-ананың қамқорлығынсыз қалған балаларға арналған мекеме бар. Олардағы балалардың саны 121 қазіргі таңда. Және атап өтерлігі – соңғы жылдары облыс көлемінде осы аталған санаттағы үш мекеме жабылды, - дейді БҚО білім басқармасы басшысының орынбасары ЗӘУРЕ ҒҰМАРОВА. Қамқорлықсыз қалған ұл-қыздарды отбасылық тәрбиеге бейімдеу мақсатында шаһардағы отбасы үлгісіндегі балалар ауылынан жасөспірімдер үйі ашылып, екінші балалар үйінде екі отбасылық топ жұмыс істей бастаған. Жалпы еліміз бойынша Батыс Қазақстан облысының бұл саладағы жағдайы жақсы дейді кеңесші Балия Әкімбекова. Балалар құқығын қорғау шараларындағы жаңалықтармен бөліскен ол жетім балалардың республикалық дерек банкі жобасы жүзеге асқалы жатқанын мәлімдеді.  Дерек банкі арқылы, мысалы, мен Астанада отырып, еліміз бойынша барлық жетім баланың жағдайын көріп отырамын. Мұндай дерек көзі барлық қамқорлаушы ұйымдардың жұмысын ширата түспек. Және барлық бағытты қамтиды. Яғни біз әр баланың тағдырын біліп отырамыз. «Неге ол әлі бұл тізімде бар, неге оған отбасы табылмай отыр?» деген сұрақтарға да жауап іздемекпіз, - Қазақстан Республкасының Білім және ғылым министрінің кеңесшісі Балия Әкімбекова. Министрлік келешекте балалар үйлерін ірілендіруді көздеп отыр. Осы бағытта енді балаларды патронаттық тәрбиеге алған ата-аналарға жалақы төленетін болады. Арман Курманалиев