Оралда 25 мұз айдыны ашылады

Оралда мұз айдындарының ашылуы жалғасуда. 16 желтоқсанға дейін 25 айдын қажетті жабдықтармен қамтылып, жұмыс істемек. Мұз алаңқайлары бұқаралық қысқы спорт түрін дамыту үшін жасалуда. Ал хоккей қорапшаларында түрлі жарыстар өткізілмек. Фото из архива "МГ" Деркөлдегі «Орал» дене шынықтыру-сауықтыру кешені қысқы демалысты ұйымдастыруға дайын бола келді. Қазір сырғанау төбелеріне қар әкелініп, шаңғы жолы бедерленуде. Жылымық күндері сәл-пәл еріп кеткен мұз айдыны қайтадан су құйылып, тегістелмек. Бұқаралық сырғанау үшін қалған жағдайдың бәрі бар. Спорттық жабдықтарды жалға беру бөлімі жұмыс істейді. - Коньки, шаңғы прокатқа береміз. Арнайы сөрелеріміз бар, қар болған заттарды кептіретін. Биыл кішкентай балаларға арналған шана мен сырғанайтын арнайы құрал - «ватрушка» сатып алдық. Былтырдан бастап осы жақтың адамдары келеді бізге. Әсіресе, сенбі-жексенбі күндері көп болады. Жақсы демалады. Бізде конькидің прокаты – балаларға – 200 теңге, үлкендерге – 300 теңге. Ал шаңғы – 350 теңгеден. Бағалар қымбат емес, қолжетімді, - дейді «Орал» дене шынықтыру-сауықтыру кешенінің әкімшісі НҰРГҮЛ БОЗОВА. Қарашадағы табиғаттың тосынсыйы мұз айдындарын дайындауға мұрсат бермеді. Енді сақылдаған сары аяз сырғанау үшін нағыз керек мұзды құюға сеп болмақ. - 16 желтоқсанға дейін Орал қаласында 25 мұз айдыны жабдықталмақ. Оның 10-ы - «Намыс» спорт клубы, тағы бір ондығы – қалалық білім беру ұйымдары және 5-уі - кәсіпкерлер көмегімен су құйылып, тегістелмек. Орал қаласында шаңғыны жалға беретін 8 орын бар. Киров саябағында тамақтану бекеті ұйымдастырылады. Сондықтан баршаңызды саламатты өмір салтын ұстануға шақырамыз, - дейді Орал қалалық дене шынықтыру және спорт бөлімінің басшысы АЗАМАТ НҰРМҰХАМБЕТОВ. Таза ауада спортпен шұғылдану - денсаулыққа пайдалы әрі көтеріңкі көңіл күй кепілі. Алда көпшілік шаңғы тебу мен хоккей, шорт-трек, тағы басқа спорт түрлерінен жарыс өтпек. Естеріңізгесала кетсек, биыл Юность стадионында күрделі жумыстар басталды. КПО б.в. компаниясының қаражатына бұнда жасанды мұз айдыны жасалып жатыр. Жұмыстар осы жылы басталып, ендігі 2017 жылдын аягына дейін аяқталу керек. Арман Курманалиев