27 октября 2018

Оралда ауыл шаруашылық өнімдерінің жәрменкесі өтті

Жəрмеңке əдеттегіше үйреншікті орынға айналған М.Ықсанов атындағы көшеде бойына жайғасты. Базар мен сауда орындарына қарағанда бағасы арзандау көкөніс пен жеміс-жидек, ет жəне өзге де ауыл шаруашылығы өнімдерін келушілер үлкен сұраныспен сатып алып жатты. -"Барлығы 27 бас сиыр еті, 7 бас жылқы еті,11 төшке қой еті сатылды. Сонымен қатар, 34 тонна картоп, 16 тонна пияз, 17 тонна қырыққабат пен 11 тонна сəбіз сатыққа шықты. 18 500 дана жұмыртқа өткен. Тұрғындар белсенді түрде өнімдерді сатып алды",-дейді ауыл шаруашылығы бөлімінің басшысы Махамбет Батырғалиев. Бүгінде жəрмеңкеге тұрақты қатысып, өтетін уақытын күтіп жүретін көпшілік қарасы да артқаны байқалады. Өнімдердің өтімділігі де жоғарылаған. Тіпті кей өнімдер бір сағатқа жетпей бітіп қалды. Сатып алу үшін қарақұрым кезекке тұруға тура келді. Соның ішінде жергілікті құс фабрикасынан əкелінген жұмыртқаны атап өтуге болады. -"Көңілімізден шығып жатыр. Мен жəрмеңкеге тұрақты түрде келіп тұрамын. Балаларым үшін жəне өз отбасыма осынан қажетті өнімдерді қолжетімді бағаға сатып алып қоямыз. Дəстүрге айналып келе жатқан жəрмеңке үзілмесе екен. Халық біледі жəне күтеді. Себебі біз сияқты қарапайым адамдарға тиімді"-дейді жəрмеңкеден ет пен жұмыртқа, көкөніс сатып алған қала тұрғыны Сара Ықсанова. -«Мен зейнеткермін. Жəрмеңке өткен сайын келіп тұрамын. 3 келі ет пен картоп, сəбіз, жұмыртқа алдым. Бағалары шынында да арзанырақ. Ұйымдастырушыларға рахмет. Артынып-тартынып осы күні балғын, таза өнімді осынан алған дұрыс деп есептеймін. Біздер əр тиынды есептеп, айдан айға зейнетақыны жеткізуге тырысамыз ғой. Бір өкініштісі -жұмыртқа бітіп қалды. Алғысы келгендердің кейбіріне жетпеді. Өткен жолы екі жерден сататын қыламыз деп еді. Кезек көп. Тек соны ескерсе екен»,-дейді зейнеткер Людмила Иванова. Ауыл шаруашылығы жəрмеңкесінде Теректі, Зеленов, Қаратөбе, Ақжайық ауданы мен Орал қаласы маңындағы шаруа қожалықтары өз өнімдері шығарған. Оларға орын жай тегін беріліп отыр. Есесіне өнімдерінің бағасын делдалсыз өз қолдарымен төмен бағаға саудалауы тиіс. Шараның мақсаты-жергілікті өнімді қолдап, шаруа қожалықтарына сауда жасауға жағдай туғызу. Арман КУРМАНАЛИЕВ
Стали очевидцем происшествия?  WhatsApp