«Бәйтерек» қоғамдық бірлестігіне биыл – 10 жыл

Ауру балалардың жанына демеу болып, жүрегін жылытқан «Бәйтерек» қоғамдық бірлестігіне биыл – 10 жыл. Бүгін сол мерейлі кезеңге орай Оралда салтанатты шара өтті. Белсенді бірлестікті әріптестері құттықтап, демеушілер мүгедек балаларға тарту-таралғы жасады. Биыл 1-сыныпқа барған ерекше балалар да сый-сияпаттан құр қалмады. Оларды ерекше балалар деп атайды. Шынымен де, дүниені түйсінуі, бітім-болмысы бөлек балалардың күтімі де ерек болуы керек. Мүгедек жандарды қанатының астына алып, сауығып кетуіне зор үлес қосқан бірден-бір қоғамдық ұйым - «Бәйтерек». 10 жылда жеткен биік көп. Бірлестік бастамасымен білім беру саласында инклюзивті кабинеттер, диагностикалық, коррекциялық сыныптар ашылды. «Шапағат» әлеуметтік-медициналық мекемесінің ашылуына да осы бірлестік ұйытқы болды. «Бәйтеректің» саясынан пана тапқандар қамқорлыққа риза. - Біз 2 жылдан бері «Бәйтерекке» барып жүрміз. Орталықтағы жаттығулар балама көп көмектеседі. Нәтиже бар. Мұндай балаларды назардан тыс қалдыруға болмайды. Айрықша көңіл бөлу керек. Бізге сондай жағдай жасап, үнемі қолдау білдіріп жүретін «Бәйтеректің» жетекшісі Меруерт Болатқызына алғысымыз шексіз, - мүгедек баланың анасы Елена АСТАФЬЕВА. Құрбан айт мерекесіне орай қайырымды жандар «Бәйтерек» орталығына барып, жан жылуымен бөліскен. Сол демеушілердің қаржысына алынған тарту-таралғылар бүгін балаларға үлестірілді. Биыл «Бәйтеректе» ем алып жүрген 50 бала алғаш рет мектеп табалдырығын аттапты. Бүгін оларға да ерекше құрмет көрсетіліп, сый-сыяпат тарту етілді. Бүлдіршіндер де құр қол келмепті. Жыр жолдарын жатқа оқыды. Салтанатты шарада қоғамдық бірлестіктің мерейтойымен әріптестері және облыстық ішкі саясат басқармасы өкілі құттықтады. «Бәйтеректің» – қоғамдық ұйымдар арасындағы ең белсенді бірлестік екені атап өтілді. Онжылдық салтанатында бірлестік ұжымы құттықтаулар қабылдап қана қоймай, өздері де сый-сыяпат жасады. Екі ата-анаға цирктің билет сатылымынан түскен қаржының 1 пайызы, яғни 30 мың теңгеден берілді. Ал мерейлі жылдың ең басты жаңалығы - 10 жылдықта 10 млн теңгелік тосынсыйға ие болуымыз дейді бірлестік жетекшісі. Әңгіме – Данияр Елеусіновтің қайырымдылығы жөнінде. - Телефон шалған жандар көп болды. Алматы, Астанадан да. Бәрін осы қаражатты қалай жұмсайды деген сұрақ қызықтырады. Мен бұдан бұрын да айтқам, 10 млн теңге соншалықты үлкен қаржы емес. Біз комиссия көмегімен бұл қаражаттың тиміді жұмсалуын қадағалаймыз. Әрі әр тиыны үшін есеп береміз. Даниярдың есімі науқас балаларды қайта оңалту ісінің бастамашысы ретінде тарихта қалады. Бұл сома оңалту орталығының құрылысына салынған алғашқы қаржы көзі болмақ, - дейді «Бәйтерек» қоғамдық бірлестігінің төрайымы Мерует САНКАЕВА. Бүгінде тек Орал қаласында 1000-нан аса мүгедек бала бар. «Бәйтеректіктер» сондай ерекше ұл-қыздардың жігерін жанып, қолұшын беру – біздің басты міндетіміз деп біледі. Арман Курманалиев