Колледждер арасында облыстық фестиваль мәреге жетті

Ел Тәуелсіздігінің мерейтойына орай өңірде «Бірлік пен Жасампаздықтың 25 жылы» атты облыстық фестиваль қорытындыланды. Техникалық және кәсіптік білім беру ұйымдарының арасындағы байқауға 29 колледж қатысқан. Бұл күні тек фестиваль үздіктері ғана емес, саланың озық қызметкерлері де марапатталды. Байқау шартына орай колледждер жетістігін баяндайтын көрме ұйымдастырылды. Иллюстративное фото из архива "МГ" Көрмеге коледж оқушылары барын салыпты. Мұнда әр түрлі мамандық иелері екі-үш жылдың ішінде киім пішіп, темірден түйін түйіп, роботтехниканы меңгеріп, аспаздық өнердің де қыры-сырын игергендері байқалады. Дуальді оқытудың игілігін көрген жастар білімді тәжірибемен ұштастырып жүр. Колледждер арасындағы облыстық фестивальға тек Орал қаласы емес, аудандардағы техникалық және кәсіптік білім беру ұйымдары қатысқан. Байқау асяындағы «Индустриялық және инновациялық Қазақстан» тақырыбындағы көрмеде ғарыштық аппарат та, ай-ти жабдықтары мен құрылыс, өндіріс техникалары да ұсынылған. Нан және кондитерлік өнімдерден жасалған тәттілер де тәуелсіздіктің 25 жылдығын бедерлепті. Бүгінде өңірдегі 38 колледжде 20 мыңға тарта бала оқиды. Қазір, әсіресе, өндіріс, ауыл шаруашылығы саласына жас буынның күші ауадай қажет. Өйткені зауыттар мен шаруашылықтардағы кадрлар қартайып барады. Сондықтан облыс әкімі Алтай Көлгінов өз сөзінде жастарға алаңсыз білім алып, өлкенің көркеюіне үлес қосуды үндеді. Салтанатты шарада әуелі осы саланың озық қызметкерлері марапатталды. Содан соң фестиваль үздіктері сахнаға шықты. Байқау қорытындысында 8 аталым бойынша үздіктер анықталды. Оның ішінде ауыл-аймақтан келген оқу орындарының ұжымы да бар. «Индустриялық және инновациялық Қазақстан» тақырыбындағы көрме бойынша Орал мұнай-газ және салалық технологиялар колледжі лауреат атанды. Хор ұжымы байқауы бойынша БҚ академиялық колледжі, тарихи оқиғалардың күнтізбелігін шолу кезеңінде ауыл шаруашылығы колледжі, ән, би бойынша Рубежка мен экономика және ақпараттық технологиялар колледждері үздік атанды. Ақжайық, Шыңғырлау, Тайпақ білім ошақтары да тұрлі аталымдарда топжарды. Шара соңы байқаудың ән, би, хор бөлімдерінде топ жарған өнерлі жастардың гала-концертіне ұласты. Арман Курманалиев