Орал қаласы тұрғындарына мұздан келер қауіп ескертілді

Күннің суытып, сынап бағанасының нөлден төмен сырғи бастауы қала аумағын қоршаған өзен-көлдердің суын қатырып, беттеріне қаймақтай қабыршақ мұз тұрғызды. Ал тұрғындар осы жұқа мұздың ойылып кетерін жəне адам өміріне қандай қауіп алып келерін əсте естен шығармауы керек. Бұл адам өмірі қауіпсіздігі үшін маңызды ескерту. Орал қаласы əкімдігінің кіші залында өткен брифингте сала мамандары мұздан келер қауіп жоғары екенін ескертті. -"Біз мұздың қалыңдығын өлшеп көрдік. 3-4 сантиметрді құрайды. Соған қарамастан адамдар мұз үстіне шығуға асығыстық танытып жатқандарын байқадық. Əсіресе балықшылар.  Ескерту үн-парақшаларын таратып жатырмыз. Қауіптің алдын алу үшін іс-шаралар атқарылуда",-дейді БҚО төтенше жағдай департаменті бастығының орынбасары Ақылбек Ахметжанов. Қазіргі кезде өзен суларының кей жерлерінде мұздың қалыңдығы небəрі 3-4 сантиметрді құрауы дабыл қағарлық жағдай. Асығыстықпен қанша адам опық жеді. Алайда осыдан сабақ алып, "сақтықта қорлық жоғын" ескермейтіндер баршылық. Мұз үстіне шығып, балық аулайтындар үшін қауіпті шақ орнады. Қармақ салудың қызығына берілген балықшылар кейде мұздың əлсіздігін естен шығарып, бастарын қатерге тігіп жатады. -"Мен балық аулауды кəсібімнің бірі санаймын. Табиғат аясында отырып, таза ауамен тыныстағанға не жетсін?! Ал қауіпсіздікке қарт балықшылар жіті ден қояды. Өзім сынды балық аулаушылардың кейбірі күн салқында денелерін жылыту үшін ішімдік тұтынады. Қате деген аяқ астында. Осының кесірі тиеді ме деп қорқамын",-дейді жергілікті балықшылардың бірі Аркадий ақсақал. Сонымен қатар, балалардың да қысқы ойындарға құмартып, мұз үстінде сырғанауға асығуы қалыпты жайт. Бұл орайда ата-аналар ойын баласын қараусыз жібермей, отбасы мен мектепте оқушыларға түсіндіру жұмысы жүргізілсе дейді төтенше жағдай департаментінің мамандары. Мұздың қалыңдығы 10 сантиметрге жеткен кезде ғана ол ересек адамды көтере алады. Мұндай қалыңдық ағысты өзендерде қалыптасуы үшін ауа температурасының тұрақты түрде төмен болуы шарт. Ал əзірге беті қатқан судың асты толқындап жатыр. Арман КУРМАНАЛИЕВ