Орал қаласында ауыл шаруашылығы жәрмеңкесі өтті

Жәрмеңке бұрынғыша Ықсанов көшесінің бойында өтіп жатыр. Облыстың барлық кәсіпкерлері өз өнімдерін сату үшін өтініш білдіріп, осынан тегін орын жайға ие бола алады. Жәрмеңкедегі көкөністер мен жеміс-жидектердің бағасы базармен салыстырғанда біраз арзанға түсті. Қазір базар сөрелерінде самсаған қызылды-жасылды жеміс-жидектер мен көкөністердің бағасының төмендегені байқалады. Осыдан бір айға жуық уақыт бұрын дәруменді өнімді тұтыну тұрғындар қалтасына ауыр тисе, қазір қыс азығын қамдауға қолайлы жағдай орнығыпты. Естеріңізге сала кетейік, жергілікті азық-түлік өндірушілер жәрмеңкесі тамыз айының басынан бері сенбі, жексенбіде сағат 09.00-ден 15.00-ге дейін жұмыс жасауды дәстүрге айналдырды. Мұндағы баға нарықтағыдан 10-15 пайыз арзан. Жергілікті билік бұл бастама бәріне қолайлы деп санайды. -«Жәрмеңкеде картоп-65-70, пияз - 70-80, қарбыз-80, қауын-100, оралдық құс фабрикасы жұмыртқасының 10 данасы -140 теңгеден сатылды»-дейді қала тұрғыны Ирина Быслина. Айта кетейік, қалалық кәсіпкерлік бөлімінің мамандары таратқан ақпаратқа сәйкес, қала тұрғындарын қалтаға қонымды бағасымен қуантқан жәрмеңке Ықсанов көшесінде шаруаларға қолдау ретінде тегін орын жайда жайылады. Аталған жәрмеңкеге 50-ге жуық Ақжайық, Зеленов, Теректі аудандарының, сондай-ақ қала маңының ауыл шаруашылығы тауар өндірушілері, қайта өңдеу кәсіпорындары және ірі көтерме тауар жеткізушілері қатысты. Тауар өндірушілерге сауда орындары тегін берілді. Жәрмеңкенің қорытындысы бойынша жалпы соммасы 2,7 млн. тенгеге ауыл шаруашылығы өнімдері сатылды. Жәрмеңкеге ең өтімдісі- әлеуметтік тауарлар болды. Жергілікті билік бұл бастама бәріне қолайлы деп санайды. Кәсіпкерлер өнімдерін тұрақты өткізу нарығын тапса, тұрғындар тауарларды қолжетімді бағаға сатып алып, қалта қаражатын біраз үнемдейді. -«Мені осындай жәрмеңкені ұйымдастырып жатырғандары қуантады. Қарапайым халық үшін бұл да бір жеңілдік. Себебі біз үнемі қай жерде не арзан екенін іздеп жүріп сатып аламыз. Ал жәрмеңкеде осындай өнімдердің бәрін бір жерден таба аламыз. Табанымыздан таусылып, ұзақ жүрмейміз. Жәрмеңке-біз үшін мереке»,-дейді қала тұрғыны Қадиша Уалиева. Сатушылар баға алда бұдан да түседі деп болжайды. Жергілікті өнім жәрмеңкесі енді алдағы 11,18,25-тамыз күндері Ықсанов көшесінің бойында жалғасын табады. Арман КУРМАНАЛИЕВ