Оралда 10 мың адамды қамтитын жаңа алаң ашылды

Оралда Тәуелсіздіктің 25 жылдығына орай жаңа алаң ашылды. Зәулім ғимараттар мен сәулетті мүсіндер, бірнеше субұрқақ пен архитектуралық композицияларды қамтыған мәдени-демалыс орнының келбеті көркем. Жаңа алаң қазірдің өзінде оралдықтардың сүйікті мекеніне айналды. Иллюстративное фото из архива "МГ" Жайық жағасындағы сұлу шаһар тағы бір көрікті жермен толықты. Қаланың 5 және 7-ші шағынаудандар аралығында аумағы 7 гектар жаңа алаң ашылды. Бұл орын бір мезетте 10 мың адамды қамти алады. Көркем мекен қала күні салтанатты түрде ашылды. - Тәуелсіздіктің 25 жылдығына орай Орал қаласында жаңа алаңның құрылысы аяқталды. Құрылыстың жалпы құны – 1 млрд. 483 млн. теңге. Жаңа алаң салынуының бірден-бір себебі, жаңа шағынаудандарда тұратын тұрғындардың саны артуына байланысты олардың қыдырып, серуендеуіне жағдай жасау мақсатында қолға алынды, - дейді ОРАЛ қаласы әкімінің орынбасары Алтынбек ҚАЙСАҒАЛИЕВ. Жаңа алаң құрылысы 2014 жылдың көктемінде басталған еді. Бірегей сәулет кешені мерзімінен бұрын ашылып отыр. Көркі көз тартатын атшаптырымдай аумақ үш бөлікке бөлінген. Бірінші, ойын-сауық аумағында Қадыр Мырза Әлі орталығы, Салтанат сарайы, Достық үй ғимараттары бар. Екінші, орталық-әкімшілік бөлігінде мемлекеттік, мәдени-бұқаралық шаралар ұйымдастырылады. Ал үшінші демалыс, саябақ аумағында 4 ротонда, шеңбер тәріздес субұрқақ бой көтерген. Алаңның ең басты көркі – субұрқақ. Мұнда бір емес, қатарынан 7 фонтан бар. Солардың ішіндегі бірегейі – каскадты субұрқақтар. Тың жобаның ұзындығы 335 метр. Аумағы 4700 шаршы метр. Бұл нысанның елімізде баламасы жоқ дейді мамандар. Жаңа алаңның ашылуы ән-күймен әдіптелді. Субұрқақтар әуезді әуен, түрлі-түсті жарықпен әспеттеліп, гүлзар, жасыл желекпен көмкерілген. Алаңның үшінші бөлігінде кітапқа арналған архитектуралық композиция ашылды. Ұлы тұлғалар мен асыл қазынаны ұлықтаған ескерткіш көпшілік үшін тосынсый болды. Келешекте алаң бұдан басқа да композициялық мүсіндермен ажарланбақ. Шырайлы шаһардың ажарын айшықтаған бұл мекен оралдықтардың сүйікті демалыс орнына айналып үлгерді. - Бұрын бұл жер құр дала еді. Ештеңе болған жоқ. Ал қазір, мәне, жаңа алаң ашылып, айналасына зәулім ғимараттар, үйлер салынып көркейіп жатыр. Бұл халық үшін үлкен сый. Бұл жерге жиі келіп тұрамыз енді, - дейді қала тұрғыны Фарид ШАГНИДИНОВ. Жаңа алаңның ашылуы 80-90-жылдар әуендері шырқалған ретро-концертке ұласты. Мерекелік шарада әйгілі «Ялла» ансамблі өнер көрсетіп, оралдықтар мен қала қонақтарының ыстық ықыласына бөленді. Арман Курманалиев