Оралда ІІІ халықаралық «WESTKAZINVEST» инвестициялық форумы өтті

Оралда ІІІ Халықаралық инвестициялық «WESTKAZINVEST» форумы өтті. Айтулы жиын өңірдің инвестициялық әлеуетін таныстыру, аймақаралық ынтымақтастықты нығайту, энергетика, машинажасау, инфрақұрылым мен ауыл шаруашылығы салаларында бірлескен кәсіпорындар құруды көздейді. Форум аясында отандық тауар өндірушілердің көрмесі көпшілікке таныстырылды. Халықаралық жиын аясындағы көрмеде 80-ге тарта кәсіпорын өз өнімі мен қызмет түрін ұсынды. Құрылыс, машинажасау өнімдерімен қатар, тұрмыстық бұйымдар, киім-кешек, азық-түлік тауарларының да мол таңдауы бар. Ал залдың ортаңғы бөлігінде орын тепкен жылыжай, қонақүй кешендерінің құрылысы, цемент тақтатасы мен минералды ұнтақ өндірісі, құрама жем зауыты, өзге де жобалар – өңірдің инвестициялық әлеуетін паш еткен тың жоспарлар. Көрмеде нарықта аяғынан тік тұрып, өңір мақтанышына айналған ірі кәсіпорындармен қатар, өзі ісін енді бастаған шағын цех өкілдері де өз өнімін ұсынды. Облыстағы жоғары оқу орындарының инновациялық жобалары да келушілердің қызығушылығын оятты. Бұйымдар жан-жақтылығымен, алуан түрлілігімен көз қуантады. Биылғы көрме бұрынғылардан ауқымдылығымен ерекшеленді. Мұны шетелден келген меймандар да растайды. - Мен бүгін көрмеден қазақстандық түрлі саладағы компанияларды көріп қуандым әрі таңғалдым. Сапасына риза болдым. Өнімдерінде кәдімгі халықаралық деңгей бар. Енді біз батысқазақстандық кәсіпкерлерді мамандыру жағынан қолдауымыз керек деп есептеймін, - дейді Чех-Орта Азия сауда палатасының президенті Иржи Неставал. Көрмеден соң «Уестказинвест» форумының жұмысы пленарлық жиынмен жалғасты. Форумға 7 мемлекеттен - Иран, Италия, Финляндия, Ұлыбритания, Испания, Чехия, Шотландия, Ресей мен өз еліміздің өзге өңірлерінен кәсіпорын, корпорация, компания өкілдері келді. Бұл шетелдіктердің Батыс Қазақстан облысының экономикасына қызығушылықпен қарайтынын айғақтайды. Қазақстанның сенімді әріптестерінің бірі – Финляндия. Бұл ел жасыл экономикада, электр үнемдеуде, қоршаған ортаны қорғауда әлем бойынша көш бастап тұр. Үлгілі мемлекет біздің елге де тың технологиялар әкелуде. Енді, міне, Батыс Қазақстанмен де байланыс жасауға ниетті. Форумда фин кәсіпорындарының көмегімен Оралда «Смарт сити-Ақылды қала» жобасы іске қосылғаны жарияланды. Жиында қаржы орталықтары мен институттары, ұлттық холдинг, шетелдік корпорация өкілдері мен ірі бизнесмендер өз жобаларын таныстырып, өңір дамуына қатысты ой-пікірін білдірді. Шара соңында жалпы құны 6,2 млрд теңге болатын 13 меморандумға қол қойылды. Соның бірі тұрмыстық қатты қалдықтар өндірісі бойынша Орал қаласының әкімдігі мен фин компаниясының арасындағы келісім. - Біздің жоба - «Ақылды қала» жобасының бір бөлшегі. Соның ішінде тұрмыстық қатты қалдықтарды жою, абаттандыру саласына қатысты. Біз биогаз стансасын саламыз. Қазір мысалы, Оралдағы полигонда метан газы ауаға кетіп жатыр. Біз бұл газдан қуат өндіреміз, - «DORANOVA» фирмасының сарапшы директоры Андрей Аверин. Енді машинажасу, құрылыс, инфрақұрылым, ауыл шаруашылығы салаларында келісімге қол қойылған инвестициялық жобалар сәтті жүзеге ассын делік. Сонда ғана бұл айтулы форумның нақты нәтижесіне куә боламыз. Арман Курманалиев