Оралда көпшілік жүгіру шарасы өтті

Оралда Абай алаңынан П.Атоян атындағы стадионға дейін ел тәуелсіздігінің 25 жылдығы мен қала күніне орай көпшілік жүгіру шарасы өтті. Оған мыңдаған оралдық қатысып, саламатты өмір салтын насихаттады. Абай алаңынан сөреге тұрғандар үш шақырым жолды артқа тастап, Атоян атындағы стадионда мәре сызығын қиды. Абай атындағы орталық алаңға жиылған халықтың қарасы көп. Олар жексенбі күні болса да қала күніне арналған жаппай жүгіру шарасына қатысуға ниеттілер. Орал біздің қаламыз. Қала күніне арналған іс-шаралар баршамызға ортақ. Оған үн қосу әркімнің міндеті дейді алаңға жиылғандар. - Ұлттың денсаулығы мықты болу керек деп ойлаймын. Спортқа елімізде көп көңіл бөлініп келе жатыр. Осындай шаралар көптп ұйымдастырылса деймін, - дейді Орал қаласының тұрғыны Серік Әбішев. Жаппай жүгіру сайыс емес. Яғни, жеңімпаздар анықталмайды. Бұл, Орал қаласы күніне арналған жоспарлы шаралардың бірі. Дегенмен, көппен бірге сөреге тұрғандардың жас ерекшеліктері де әр түрлі. Әсіресе, жастар мен мектеп жасындағы жеткіншектердің белсенділігі жоғары. Достық даңғылында сөреден аттанғандар үш шақырым жолды бетке алды. Еуразия бағытына бұрылғандар одан соң Атоян атындағы стадионға бет түзеді. Жүгірушілердің алдыңғы сапын Риода өткен 31-ші жазғы олимпиадада ел намысын қорғаған оралдық спортшылар құраса, одан кейінгі лекті мемлекеттік қызметшілер, құқық қорғау органдары және өзге де мекеме-кәсіпорындар, оқу орындарының желаяқтары жалғады. Белгіленген қашықтықты артқа тастағандар мәре сызығын қиды. Жаппай жүгіруге қатысып, қала күніне арналған іс-шараға үлес қосқан оралдықтар мен шаһар қонақтарын облыс әкімі Алтай Көлгінов құттықтады. Шара соңында «Спортшылар отбасы», «Ең креативті қатысушы», «Ең жас және егде қатысушылар», «Спорттық ұжым», «Ең нәзік қатысушы» аталымдары бойынша үздік атанғандар арнайы сыйлықтармен марапатталды. - Ұлттың саулығы - бұл болашақ еліміздің даму кепілі. Сондықтан осы аталмыш бастаманы қолдап, ұжым әрқашан спортқа жанашыр ретінде өз семтігін тигізу керек деп ойлаймын, - дейді жүгіруге қатысушы Нұрғиса Қамашев. Спорттық шара кір тасын көтерушілер мен ауыр атлеттер арасында жалғасын тапты. Батпан салмақты қақпақылдай ойнатқандардың өнері жиылған көпшілікті таң қалдырды. Қала күніне арналған спорттық шаралар апта бойы жалғасын табады. Арман Курманалиев