Оралдықтар жаңа əліпби бойынша диктант жазды

Диктантқа 100 мыңнан астам Батыс Қазақстандық қатысты. Оларға жарты сағат уақыт берілді. Айта кетейік, республика бойынша жаңа қазақ әліпбиі графикасымен жалпы халықтық диктант алғашқы рет өткізілуде. Оның мәтіні Елбасының "Болашаққа бағдар "Рухани жаңғыру" бағдарламалық мақаласына арналған. Аталмыш шара бұл күні еліміздің түпкір-түпкірінде ұйымдастырылып, оған он бес жастан жоғары мектеп оқушылары, студенттер, мемлекеттік қызметкерлер мен облыс тұрғындары қатысып отыр. Диктант барысында аудиожазба арқылы 50-60 сөзден тұратын мәтінді тыңдап, сауатты түрде латын графикасымен парақ бетіне түсіру қажет. Шараға əкімдіктің 60-тан астам қызметкері қатысты. -"Жалпы диктант жақсы деңгейде өтті деп айта аламын. 30 минуттың ішінде 90 сөз көлемінде жазылды. Қатысушылар жаңа латын қарпіндегі қазақ əліпби емлесі жобасымен жəне сөздігімен танысты. Əкімдіктің бөлім басшылары мен қызметкерлері, түрлі сала мамандары белсенділік танытты ",-дейді Орал қалалық мəдениет жəне тілдерді дамыту бөлімінің басшысы Қуанышбек Мұқанғалиев. Осыған дейін жобаны талқылау барысында жүргізілген танысу жұмыстарының арқасында шығар диктантты жазу барысы қатысушылар үшін аса күрделі бола қойған жоқ. -"Жалпыхалықтық диктант жаман өткен жоқ деп ойлаймын. 2025-жылға дейін біз кезең-кезеңмен осы реформаны игеруге тиістіміз. Маңызға ие жобаны жүзеге асыру өзімізден басталады",-дейді əкімдік қызметкерлері. «Қазақ тілі әліпбиін латын графикасына 2025-жылға дейін кезең-кезеңімен көшіру жөніндегі іс-шаралар жоспары» Қазақстан Республикасының Мәдениет және спорт министрлігінің тапсырмасына орай ҚР Президентінің Жарлығына және  Премьер-Министрдің өкімімен бекітілген. Тапсырманы іске асыру мақсатында латын негізді қазақ тілі әліпбиінің, «Қазақ тілі емлесінің негізгі ережелері» жобасының практикалық тұрғыда меңгерілуін жан-жақты қамту, нақтылай түсу, өзін-өзі бағалау, бейімделу барысында осы кезеңге дейін жоба бойынша үнемі жұмыс жасалып, жаңа графика жетілдіріледі. Жалпыхалықтық диктанттың нəтижесі 5 күннен соң белгілі болмақ. Жаңа графиканы қазірден бастап меңгертудің астарында ауқымды жұмыстың күрделілігін жеңілдету көзделген. Құлақ естіп, көз көріп, үйреншікті болған графикаға көшу де сонда қиын болмақ емес. Айта кетейік, латын негізді графиканың бұған дейін 3 нұсқасы ұсынылған болатын. Көпшілікпен талқылану нəтижесінде соңғы нұсқа қалдырылып, осы қаріптер емлесі түсіндірілуде. Басты мақсат-графикаға бейімдеп, сауатты жазуды қалыптастыру, емлені көпшіліктің санасына сіңіру. Арман КУРМАНАЛИЕВ