Зачаган кентіндегі бірнеше көше жолының құрылысы қазанда аяқталады

«Үйіміз орта жолда қалған арал сияқты. Жол жоқ. Белуардан балшық кешіп жүрміз». Бұл Зачаган кенті тұрғындарының бізге айтқан шағымы. Соңғы жылдары бұл аумақтағы жаңа шағынауданда құрылыс қарқын алды. Алайда жоспарлы жұмыста іркіліс бар. Иллюстративное фото из архива "МГ" Күздің жауын-шашыны қаланың асфальтсіз көшелерін ми батпаққа айналдырды. Әсіресе, Зачаган кентіндегі М.Мөңкеұлы 83/2-үй мекенжайындағы тұрғындардың өкпесі қара қазандай. «Көктемде топырақты қырып әп-әдемі бастаған еді. Алайда, міне, алты ай жаз өтті жол әлі салынған жоқ» деп наразы халық. Әкімдердің есеп беруде берген уәдесі желге ұшып, іс биыл да аяқсыз қала ма деп қауіптенеді жұрт. Үйіміз далада қалған арал сияқты. Жол жоқ. Балшық. Түнде ауырғанда мына жерге «скорый» келе алмайды. Такси де келмейді. Жалпы жол салып жатыр. Салмайды деуге болмайды. Бірақ жұмыстары нашар өте. Күз болса келіп қалды. Енді уақыттан ұтылмау үшін екі ауысыммен жасап, тездету керек қой жұмысты, - дейді осы үйдің тұрғыны Яхуд ҚОЖИЕВ. Ал Райхан ШАРАФИЕВА әсіресе, балаларға қиын екенін айтып, дабыл қағады: Балабақшаға да, дүкенге де жол жоқ. Жол салуды бастауын бастады, бірақ аяқтаған жоқ. Соны тезірек аяқтаса, жөн болар еді. Мына балаларға обал. Алайда бұл үйаралық жолдарды қазанда салып бітіреміз дейді құрылысшылар. Әзірге «49-шы көше» деп шартты түрде атау берілген жол бөлігінде күн жаңбыр болғасын, жұмыс тоқтап тұр. Жол салуда кездейсоқ туындаған кедергілер де көп дейді мердігер. - 49-шы көшенің жұмысы қазір тоқтап тұр. Өйткені, ол жерде кәріз құдықтары, шұңқырлар пайда болды. Апатты жағдайлар орын алды. Су, жылу желілері бар. Қасында үйлер салынып жатыр. Соның бәрі жол құрылысына кедергі келтіріп тұр. Бірақ биыл қазан айында асфальтті жолды салып бітіреміз. Бұл жол Орал-Атырау тасжолынан басталып, Орал-Саратов тасжолына дейін барады, - дейді «АЗИЯТЕХСТРОЙ» ЖШС учаске басшысы Наурызбек ҚАЙЫРҒАЛИЕВ Бұл көшеден басқа биыл Зачаган кентіндегі жаңа шағынауданда тағы үш көше мен үйаралық жол бөліктерінің құрылысын аяқтаймыз деп уәде берді құрылысшылар. Бұл аумақта жаңа тынымбақ та салынып жатыр. Қазір өрнектас төселіп, жол тегістелуде. Сол нысан құрылысы, көше және тұрғын үйге кіреберіс жолдар, арық жүйесі, осының бәрі бір жобаға біріктірілген. - Жоба бойынша жаңа шағынаудандағы жұмыс көлемі 2014 жылы басталды. Осы аумақта салынатын жалпы жолдың ұзындығы 7 шақырым. Қазір 4,5 шақырым жол салынып бітті. Яғни жұмыстың 50 пайызы орындалды. Жобаға «Нұрлы жол» бағдарламасының аясында қаражат бөлінді. Келісімшарт бойынша 1 млрд 89 млн теңге, - дейді Орал қалалық құрылыс бөлімінің сектор меңгерушісі Әлібек ИСМАНОВ. Жаңа шағынаудандағы жалпы жұмыс көлемі 2017 жылы аяқталады деп жоспарланған. Арман Курманалиев