Тұтынушылар қарызы 1 миллиард теңгеден асқан

Орал қаласының тұтынушылары биылғы қыста жылусыз қалуы мүмкін. Негізгі жылумен қамтамасыз етуші кәсіпорын басшылығы осылай деп отыр. «Жайықжылуқуат» АҚ-ның көрсеткен қызмет үшін тамыз айының басында тұтынушылардан алажағы 452 миллион теңге болса, есесіне, «Қазтрансгазаймаққа» көгілдір отын үшін бережағы 471 миллион теңгеден асқан. Соңғылары төленбеген ақы үшін жылу беруші кәсіпорынды бірнеше рет сотқа берген. Жылу беруші кәсіпорын биылғы жылу беру маусымына 100 пайыз дайынбыз дейді. Осы уақытқа дейін өз қаражаты есебінен 295 миллион теңге бөлініп, барлық жылыту қазандықтары күрделі жөндеуден өткізілген. Жоспарланған 7,9 шақырым желінің орнына 8 мың 492 метр жылу құбырлары жаңғыртылған. Орал қаласы бойынша 1164 көп қабатты тұрғын үй кәсіпорынның тұтынушылары болып саналады. Олардың 804-і ПИК-не қосылған. Әзірге, 685 үйдің қысқа дайындығы толық тексерістен өтсе, 313-не дайындық құжаттары берілген. Жылда айтылатын, ПИК-терге қосылмаған, жауапты тұлға тағайындалмаған үйлерге қатысты мәселе биыл да туындап отыр. - Ондай үйлердің саны Орал қаласы бойынша 319. Бұл үйлердің қысқа дайындығы өте баяу жүргізіліп жатыр. Соның тек 64-і ғана толық тексерістен өткізілсе, 19-на дайын екендіктері туралы құжат берілді. Қазан айының 15-не дейін барлық үйлер қысқы жылу беру маусымына дайын болады деп ойлаймын. Әрине, тұтынушылар біздің кәсіпорын алдындағы қарыздарын өтесе, - дейді «ЖАЙЫҚЖЫЛУҚУАТ» АҚ бас директоры МҰРАТ ИҒАЛИЕВ. Қарыздың мөлшері көбеймесе, азаяр емес. 65 мың тұтынушының 9 мыңнан астамы уақытында төлем жасауды мүлдем тоқтатқан. Басым бөлігі жеке тұлғалар. Олардың кейбірінің жылуға бережағы 1 миллион теңгеге жақындаған. Газды, суды, жарықты беруді тоқтатуға немесе желіден ажыратуға болады. Ал, пәтерлерге кіріп, жылуды жабуға біздің құзырымыз жүрмейді. Сол себепті, сотқа шағымданудан басқа амал жоқ дейді кәсіпорынның бас директоры. - Сот орындаушылардың көмегі арқылы біраз қарызды өндірген болдық, бірақ әлі де жетіп жатыр. Қазір ғимараттан 4 жеке сот орындаушыға арнайы бөлме бөлдік. Олар қарызды қайтарумен шұғылдануда. Енді бережақ тұлғалардың дүние-мүліктерін, иеліктеріндегі жылжыйтын, жылжымайтын мүліктерін тәркілеу жайын қарастырудамыз. Жыл басында тұтынушылардың қарыздары 1 миллиард теңгеден асты. Жаз бойы жүргізілген жұмыстардың нәтижесінде бұл соманы едәуір төмендеткендей болдық. Көшпелі бригадалар шығарып, демалыс, мереке күндері үйлерінен ақы да жинастырдық. Дәл қазір 29 тұтынушының сұраныстары бойынша жылу берілген. Олардың 16-сы бала бақша, 9-ы білім, 4-і денсаулық нысандары. Ал, қалалық әкімдіктің шешіміне сәйкес суық ерте түссе, қалған тұтынушыларға да жылу беруге дайынбыз. Тек, тұрғындар біздің қызмет үшін тиісті төлемдерін уақытында жасап, қордаланған қарыздарын қайтарса. Себебі, газ беруші кәсіпорын алдындағы бережақтарымызды өтемейінше, олар бізге көгілдір отынды жеткізуді тоқтатуға шешім қабылдап отыр. Соңғы мерзім, қыркүйектің 26-сы. Болмаған күнде тұтынушылар жылусыз қалуы әбден мүмкін дейді жылу беруші кәсіпорын басшылығы. Арман Курманалиев